Amo 2 | NdeIBE | STEP | Nanku okutshiwo nguJehova: “Ngenxa yezono ezintathu zaseMowabi loba ngenxa yezine, kangiyikulunqanda ulaka lwami, ngoba utshise amathambo enkosi yase-Edomi aze afana lekalaga,

Amos 2

1 Nanku okutshiwo nguJehova: “Ngenxa yezono ezintathu zaseMowabi loba ngenxa yezine, kangiyikulunqanda ulaka lwami, ngoba utshise amathambo enkosi yase-Edomi aze afana lekalaga,

2 ngizathumela umlilo kuMowabi ozalobisa izinqaba zaseKheriyothi. UMowabi uzachitheka kulokuxokozela okukhulu lokumenyezelwa kwezitsho zempi lokukhala kwecilongo.

3 Ngizaqothula ababusi bakhe ngibulale zonke izikhulu zakhe kanye laye,” kutsho uJehova.

4 Nanku okutshiwo nguJehova: “Ngenxa yezono ezintathu zikaJuda loba ngenxa yezine, kangiyikulunqanda ulaka lwami, ngoba bawalile umthetho kaJehova kabaze bagcina lezimiso zakhe, ngoba badukiswe ngonkulunkulu bamanga, onkulunkulu abalandelwa ngokhokho babo.

5 Ngizathumela umlilo koJuda ozalobisa izinqaba zaseJerusalema.”

Ukwahlulelwa kuka-Israyeli

6 Nanku okutshiwo nguJehova: “Ngenxa yezono ezintathu zika-Israyeli loba ngenxa yezine, kangiyikulunqanda ulaka lwami ngoba bathengisa abalungileyo ngesiliva, labaswelayo ngamanyathelo.

7 Banyathela phezu kwamakhanda abayanga njengaphezu kothuli lomhlabathi banqabele imfanelo yabacindezelweyo. Uyise lendodana bembatha lantombinye kanjalo bangcolise ibizo lami elingcwele.

8 Bacambalala phansi emaceleni amaalithare wonke, phezu kwezambatho ezithethwe ziyizibambiso. Endlini kaNkulunkulu wabo banatha iwayini elithethwe njengenhlawulo.

9 “Ngachitha um-Amori phambi kwabo, lanxa wayemude njengemisedari njalo eqine njengama-okhi. Ngachitha izithelo zakhe phezulu kanye lempande zakhe ngaphansi.

10 “Ngalikhupha eGibhithe ngalikhokhela iminyaka engamatshumi amane enkangala ukuba ngilinike ilizwe lama-Amori.

11 Ngakhupha labaphrofethi bephuma phakathi kwamadodana enu, kanye lamaNaziri ephuma phakathi kwezinsizwa zenu. Lokhu akuqotho na, bantu bako-Israyeli?” kutsho uJehova.

12 “Kodwa lanathisa amaNaziri iwayini, lalaya abaphrofethi ukuba bangaphrofethi.

13 “Khathesi-ke mina ngizalichoboza njengokuchoboza kwenqola ithwele amabele.

14 Olejubane kayikubaleka, oqinileyo uzawaswela amandla akhe, lebutho kaliyikusindisa impilo yalo.

15 Umtshoki akayikugxila, ibutho elilejubane kaliyikuphunyuka lomgadi webhiza kayikusindisa impilo yakhe.

16 Lebutho elilesibindi kakhulu, ngalolosuku lizabaleka linqunu,” kutsho uJehova.